مصحف الثريا

بِسْمِ ٱللَّهِ ٱلرَّحْمَٰنِ ٱلرَّحِيمِ سَبِّحِ ٱسْمَ رَبِّكَ ٱلْأَعْلَى ۝١

Барча кимчелекләрдән пакь булган Раббыңның исеме илә тәсбихләр әйткел, намаз укыгыл.

ٱلَّذِى خَلَقَ فَسَوَّىٰ ۝٢

Ул – Аллаһ барча вөҗудне халык кылды, һәр нәрсәне кагыйдәгә муафыйк төзеп тәмам итте.

وَٱلَّذِى قَدَّرَ فَهَدَىٰ ۝۳

Вә Ул һәрнәрсәгә тәкъдир төзеде вә һәрнәрсәне юлга салды.

وَٱلَّذِىٓ أَخْرَجَ ٱلْمَرْعَىٰ ۝٤

Вә Ул хайваннар өчен үләннәр үстерде.

فَجَعَلَهُۥ غُثَآءً أَحْوَىٰ ۝٥

Ул үләннәрне көзге көннәрдә кипкән сары кау кылды.

سَنُقْرِئُكَ فَلَا تَنسَىٰٓ ۝٦

Тиздән укырбыз сиңа Коръән аятьләрен һәм син онытмассың.

إِلَّا مَا شَآءَ ٱللَّهُ ۚ إِنَّهُۥ يَعْلَمُ ٱلْجَهْرَ وَمَا يَخْفَىٰ ۝۷

Мәгәр Аллаһ теләгәнне генә онытырсың, әлбәттә, Ул яшерен эшләнгән эшләрне дә һәм әшкәрә эшләнгән эшләрне дә беләдер.

وَنُيَسِّرُكَ لِلْيُسْرَىٰ ۝۸

Вә Без сине җиңеллеккә мүйәссәр кылырбыз, ягъни җәннәтнең мәңгелек җиңел тормышына алып бара торган шәригать хөкемнәрен сиңа бирербез.

فَذَكِّرْ إِن نَّفَعَتِ ٱلذِّكْرَىٰ ۝۹

Кешеләрне Коръән белән вәгәзьлә, әгәр аларга вәгазь файда бирә торган булса.

سَيَذَّكَّرُ مَن يَخْشَىٰ ۝١۰

Аллаһудан курыккан кеше тиз вәгазьләнер һәм ишеткән белән гамәл кылыр.

وَيَتَجَنَّبُهَا ٱلْأَشْقَى ۝١١

Вә Коръән вәгазеннән качар һич кабул итмәс, бик явыз яман кеше.

ٱلَّذِى يَصْلَى ٱلنَّارَ ٱلْكُبْرَىٰ ۝١٢

Ул явыз кеше олугъ җәһәннәмгә керер.

ثُمَّ لَا يَمُوتُ فِيهَا وَلَا يَحْيَىٰ ۝١۳

Соңра ул җәһәннәмдә үлмәс, үлсә ґәзабтан котылыр иде һәм файда күрә торган тере булу белән тере булмас.

قَدْ أَفْلَحَ مَن تَزَكَّىٰ ۝١٤

Мөшриклектән вә монафикълыктан, рия вә бидеґәт гамәлләрдән, фәхеш вә хәрам эшләрдән үзен пакьләгән һәм сакланган кеше, тәхкыйк ґәзабтан котылып өстенлек тапты.

وَذَكَرَ ٱسْمَ رَبِّهِۦ فَصَلَّىٰ ۝١٥

Вә ул кеше Раббысын зекер итеп намаз укыды.

بَلْ تُؤْثِرُونَ ٱلْحَيَوٰةَ ٱلدُّنْيَا ۝١٦

Ий кешеләр бәлки сез дөнья тереклеген ихтыяр кыласыз, барча көчегезне дөнья өчен генә сарыф итәсез.

وَٱلْءَاخِرَةُ خَيْرٌۭ وَأَبْقَىٰٓ ۝١۷

Бит ахирәт дөньядан яхшырактыр һәм мәңгелектер.

إِنَّ هَٰذَا لَفِى ٱلصُّحُفِ ٱلْأُولَىٰ ۝١۸

Тәхкыйк бу сүзләр әүвәлге пәйгамбәрләрнең сәхифәләрендә зекер ителгәндер.

صُحُفِ إِبْرَٰهِيمَ وَمُوسَىٰ ۝١۹

Ул сәхифәләр Ибраһим вә Муса г-м сәхифәләредер.